![ಮಂಗಳೂರು: ಪೊಲೀಸರ ಮಹತ್ವದ ಕಾರ್ಯಾಚರಣೆ - 6.80 ಲಕ್ಷ ಮೊತ್ತದ ಇ-ಸಿಗರೇಟ್, ನಿಷೇಧಿತ ಸಿಗರೇಟ್ ಗಳು ವಶಕ್ಕೆ, ಐವರು ಅರೆಸ್ಟ್ ಮಂಗಳೂರು: ಪೊಲೀಸರ ಮಹತ್ವದ ಕಾರ್ಯಾಚರಣೆ - 6.80 ಲಕ್ಷ ಮೊತ್ತದ ಇ-ಸಿಗರೇಟ್, ನಿಷೇಧಿತ ಸಿಗರೇಟ್ ಗಳು ವಶಕ್ಕೆ, ಐವರು ಅರೆಸ್ಟ್](https://blogger.googleusercontent.com/img/b/R29vZ2xl/AVvXsEhchGE3QJ9AzRE8AzSqi9T8ORSOw3b4acKxm0lCh6sWWS2Zmi8jaFq1ofK3v2gjTLrPVh9nSlyDbgMlt6ceGtYcVi6rqQXlXsJ8YUjO7WHSUzafazo5qHlfHt-AT1NqAvOC-FCHUQtAVxE/s1600/1680151566958128-0.png)
ಮಂಗಳೂರು: ಪೊಲೀಸರ ಮಹತ್ವದ ಕಾರ್ಯಾಚರಣೆ - 6.80 ಲಕ್ಷ ಮೊತ್ತದ ಇ-ಸಿಗರೇಟ್, ನಿಷೇಧಿತ ಸಿಗರೇಟ್ ಗಳು ವಶಕ್ಕೆ, ಐವರು ಅರೆಸ್ಟ್
Wednesday, March 29, 2023
ಮಂಗಳೂರು: ನಿಷೇಧಿತ ಇ-ಸಿಗರೇಟ್ ಹಾಗೂ ಎಚ್ಚರಿಕೆಯ ಚಿಹ್ನೆ ಅಳವಡಿಸಿರುವ ವಿವಿಧ ವಿದೇಶಿ ಕಂಪೆನಿಗಳ ಸಿಗರೇಟ್ ಗಳನ್ನು ಮಾರಾಟ ಮಾಡುತ್ತಿದ್ದ ಅಂಗಡಿಗಳಿಗೆ ದಾಳಿ ನಡೆಸಿರುವ ಬರ್ಕೆ ಪೊಲೀಸರು ಐವರನ್ನು ಬಂಧಿಸಿ 6.80ಲಕ್ಷ ರೂ. ಮೊತ್ತದ ಸೊತ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.
ಹಸನ್ ಶರೀಫ್, ಇರ್ಷಾದ್, ಸಂತೋಷ, ಶಿವು ಅಲಿಯಾಸ್ ಶಿವಾನಂದ, ರಹಮತ್ತುಲ್ಲಾ ಬಂಧಿತ ಆರೋಪಿಗಳು.
ನಗರದ ಲಾಲ್ಬಾಗ್ನ ಸಾಯಿಬೀನ್ ಕಾಂಪ್ಲೆಕ್ಸ್ನಲ್ಲಿ ಕಾರ್ಯಾಚರಿಸುತ್ತಿರುವ ಯೂನಿಕ್ ವರ್ಲ್ಡ್, ಫೆಂಟಾಸ್ಟಿಕ್ ವಲ್ಡ್, ಫೆಂಟಾಸ್ಟಿಕ್ ಶಾಪ್, ಆಮಂತ್ರಣ ಶಾಪ್, ಡೂ ಇಟ್, ವೆಂಚರ್ ಎಂಬ ಮಳಿಗೆಗಳಿಗೆ ದಾಳಿ ನಡೆಸಿರುವ ಪೊಲೀಸರು ಕೇಂದ್ರ ಸರಕಾರದಿಂದ ನಿಷೇಧಿಸಲ್ಪಟ್ಟಿರುವ ಇ- ಸಿಗರೇಟ್ಗಳನ್ನು ವಶಕ್ಕೆ ತೆಗೆದುಕೊಂಡಿದ್ದಾರೆ. ಈ ವೇಳೆ ಪೊಲೀಸರು ಆರೋಪಿಗಳಿಂದ ಎಚ್ಚರಿಕೆಯ ಚಿಹ್ನೆ ಅಳವಡಿಸಿರುವ ಸಿಗರೇಟ್ ಗಳನ್ನೂ ಪೊಲೀಸರು ವಶಪಡಿಸಿಕೊಂಡಿದ್ದಾರೆ.
ದಾಳಿಯ ವೇಳೆ ಪೊಲೀಸರು 1.50 ಲಕ್ಷ ರೂ. ಮೌಲ್ಯದ ವಿವಿಧ ವಿದೇಶಿ ಕಂಪೆನಿಗಳ 273 ಇ-ಸಿಗರೇಟ್ಗಳು ಹಾಗೂ ಎಚ್ಚರಿಕೆಯ ಚಿಹ್ನೆ ಅಳವಡಿಸಿರುವ 5.30 ಲಕ್ಷ ರೂ. ಮೌಲ್ಯದ 27 ಕಂಪೆನಿಗಳ ಸ್ವದೇಶಿ/ವಿದೇಶಿ ಸಿಗರೇಟ್ ಗಳನ್ನು ವಶಪಡಿಸಿಕೊಂಡಿದ್ದಾರೆ. ವಶಪಡಿಸಿಕೊಂಡ ಸೊತ್ತಿನ ಒಟ್ಟು ಮೌಲ್ಯ 6.80 ಲಕ್ಷ ರೂ. ಆಗಿದೆ. ಈ ಬಗ್ಗೆ ಬರ್ಕೆ ಠಾಣೆಯಲ್ಲಿ ಇ-ಸಿಗರೇಟ್ ನಿಷೇಧ ಕಾಯ್ದೆ - 2019 ಹಾಗೂ ಕೊಟ್ಪಾ ಕಾಯ್ದೆಯಡಿ ಪ್ರಕರಣ ದಾಖಲಾಗಿದೆ.