ಉತ್ತರ ಪ್ರದೇಶ :1,800 ರೂ.ಗೆ ‘ದೇಸಿ ಎಸಿ’ ಕಂಡುಹಿಡಿದ 16ರ ಬಾಲಕಿ: ಜಪಾನ್ ವಿಜ್ಞಾನಿಗಳ ಗಮನ ಸೆಳೆದ ಆವಿಷ್ಕಾರವೇನು?desi innovative 16 year girl achieved

ಉತ್ತರ ಪ್ರದೇಶ :ಪ್ರತಿಯೊಬ್ಬರ ಮನೆಯಲ್ಲೂ ಬೇಸಿಗೆಯ ಬಿಸಿಲಿನಿಂದ ತಪ್ಪಿಸಿಕೊಳ್ಳಲು ಏರ್‌ ಕಂಡೀಷನರ್‌ (AC) ಬಳಸುವ ಆಸೆ ಇರುತ್ತದೆ. ಆದರೆ ದುಬಾರಿ ಬೆಲೆ ಹಾಗೂ ಭಾರಿ ವಿದ್ಯುತ್ ಬಿಲ್ ಭಯದಿಂದ ಮಧ್ಯಮ ಮತ್ತು ಬಡ ಕುಟುಂಬಗಳಿಗೆ ಎಸಿ ಪಡೆಯುವುದು ಇಂದಿಗೂ ಕನಸಾಗಿಯೇ ಉಳಿದಿದೆ. ಈ ಸಮಸ್ಯೆಗೆ ಉತ್ತರ ಪ್ರದೇಶದ ಝಾನ್ಸಿಯ 16 ವರ್ಷದ ಬಾಲಕಿ ಕಲ್ಯಾಣಿ ಶ್ರೀವಾಸ್ತವ ಕೇವಲ 1,800 ರೂಪಾಯಿ ವೆಚ್ಚದಲ್ಲಿ ‘ದೇಸಿ ಎಸಿ’ ಎಂಬ ಕಡಿಮೆ ವೆಚ್ಚದ ತಂಪು ಸಾಧನವನ್ನು ಆವಿಷ್ಕರಿಸುವ ಮೂಲಕ ಅದ್ಭುತ ಪರಿಹಾರ ಕಂಡುಕೊಂಡಿದ್ದಾಳೆ.

​ಕೇವಲ 1,800 ರೂ.ನಲ್ಲಿ ‘ದೇಸಿ ಎಸಿ’ ಸಿದ್ಧ:

​ವರದಿಗಳ ಪ್ರಕಾರ, ಕಲ್ಯಾಣಿ ತಯಾರಿಸಿರುವ ಈ ಸಾಧನವನ್ನು ಬಳಸಿದ ಒಂದೇ ಗಂಟೆಯಲ್ಲಿ ಕೋಣೆಯ ತಾಪಮಾನ 4 ರಿಂದ 5 ಡಿಗ್ರಿ ಸೆಲ್ಸಿಯಸ್‌ವರೆಗೆ ಕಡಿಮೆಯಾಗುತ್ತದೆ.

​ಸರಳ ವಿನ್ಯಾಸ: ಥರ್ಮೋಕೋಲ್ ఐಸ್‌ಬಾಕ್ಸ್ ಹಾಗೂ 12 ವೋಲ್ಟ್ ಡಿಸಿ ಫ್ಯಾನ್ ಬಳಸಿ ಇದನ್ನು ವಿನ್ಯಾಸಗೊಳಿಸಲಾಗಿದೆ. ಫ್ಯಾನ್ ಹೊರಗಿನ ಗಾಳಿಯನ್ನು ಒಳಗೆಳೆದುಕೊಂಡು, ತಂಪಾದ ಭಾಗದ ಮೂಲಕ ಕೋಣೆಗೆ ರವಾನಿಸುತ್ತದೆ.

​ಸೌರಶಕ್ತಿಯ ಬಳಕೆ: ಈ ‘ದೇಸಿ ಎಸಿ’ ಸೌರಶಕ್ತಿಯ (Solar Energy) ಮೂಲಕ ಕಾರ್ಯನಿರ್ವಹಿಸುವುದರಿಂದ ಭಾರಿ ವಿದ್ಯುತ್ ಬಿಲ್ ಬರುವ ಭಯವಿರುವುದಿಲ್ಲ. ಅಲ್ಲದೆ, ಸಾಂಪ್ರದಾಯಿಕ ಎಸಿಗಳಿಂದ ಪರಿಸರದ ಮೇಲಾಗುವ ದುಷ್ಪರಿಣಾಮವನ್ನೂ ಇದು ತಡೆಯುತ್ತದೆ.

​ಸ್ಥಳೀಯ ಸಮಸ್ಯೆಗೆ ಪರಿಹಾರ: ಬುಂದೇಲ್‌ಖಂಡ್ ಪ್ರದೇಶದ ತೀವ್ರ ಬಿಸಿಲು ಹಾಗೂ ಅಲ್ಲಿನ ಬಡ ಜನರ ಪರಿಸ್ಥಿತಿಯನ್ನು ಕಂಡು ಕಲ್ಯಾಣಿ ಈ ಆವಿಷ್ಕಾರಕ್ಕೆ ಕೈಹಾಕಿದ್ದಾಳೆ.

​ವಿದೇಶದಲ್ಲೂ ಹೆಗ್ಗಳಿಕೆ, ಜಪಾನ್‌ನಿಂದ ಆಹ್ವಾನ:

​ಕಲ್ಯಾಣಿಯ ಈ ಸಾಧನೆಗೆ ಐಐಟಿ ದೆಹಲಿ ಆಯೋಜಿಸಿದ್ದ ರಾಷ್ಟ್ರೀಯ ಮಟ್ಟದ ಮಾದರಿ ಸ್ಪರ್ಧೆಯಲ್ಲಿ ಆಯ್ಕೆ ಸಿಕ್ಕಿದೆ. ಉತ್ತರ ಪ್ರದೇಶ ಸರ್ಕಾರ ಹಾಗೂ ‘ಅಮರ್ ಉಜಾಲಾ’ ನೀಡುವ ‘ನಾರಿ ಸಮ್ಮಾನ್’ ಗೌರವಕ್ಕೂ ಈಕೆ ಪಾತ್ರರಾಗಿದ್ದಾಳೆ. ಅಷ್ಟೇ ಅಲ್ಲದೆ, ಜಪಾನ್‌ನ ವಿಜ್ಞಾನಿಗಳು ಈ ಯೋಜನೆಯನ್ನು ಮೆಚ್ಚಿ ಸೆಮಿನಾರ್‌ಗೆ ಆಹ್ವಾನಿಸಿದ್ದಾರೆ.

​ವಿಜ್ಞಾನದ ಜೊತೆಗೆ ಸಂಗೀತದಲ್ಲೂ ಅಪಾರ ಆಸಕ್ತಿ ಹೊಂದಿರುವ ಕಲ್ಯಾಣಿ, ‘ಇಂಡಿಯನ್ ಐಡಲ್’ ರಿಯಾಲಿಟಿ ಶೋದ 3ನೇ ಸುತ್ತಿನವರೆಗೆ ತಲುಪಿದ್ದು, 50ಕ್ಕೂ ಹೆಚ್ಚು ಟ್ರೋಫಿಗಳನ್ನು ಗೆದ್ದ ಬಹುಮುಖ ಪ್ರತಿಭೆಯಾಗಿದ್ದಾಳೆ.