ಒಡಿಶಾ :ಐಷಾರಾಮಿ ಕಾರಲ್ಲಿ ಬಟ್ಟೆ ಅಂಗಡಿಗೆ ಬಂದ ಮಹಿಳೆಯರು: ಕಾಲಿನ ಮಧ್ಯೆ ₹7 ಲಕ್ಷ ಬೆಲೆಯ ಸೀರೆಗಳನ್ನು ಇಟ್ಟುಕೊಂಡು ಎಸ್ಕೇಪ್!

ಒಡಿಶಾ: ಅಂಗುಲ್ ನಗರದ ಅಮ್ಲಾಪದಾದಲ್ಲಿರುವ ಬೊಯಾನಿಕಾ ಶೋರೂಮ್​ ಗೆ ಐಷಾರಾಮಿ ಕಾರಿನಲ್ಲಿ 7 ಜನ ಮಹಳೆಯರಿದ್ದ ತಂಡವೊಂದು ಶನಿವಾರ ಬೆಳಗ್ಗೆ 11ಗಂಟೆ ಸಮಯಕ್ಕೆ ಬಂದಿಳಿಯಿತು. ಇವರನ್ನು ನೋಡಿದ ಸೀರೆ ಅಂಗಡಿ ಮಾಲೀಕರು ಖುಷ್ ಆಗಿದ್ದರು. 7 ಜನ ಮಹಿಳೆಯರು, ಅದರಲ್ಲೂ ಐಷಾರಾಮಿ ಕಾರಿನಲ್ಲಿ ಬಂದಿದ್ದಾರೆ ಅಂತಾ ಅವರು ಅಂಗಡಿ ಒಳಗೆ ಪ್ರವೇಶಿಸುತ್ತಿದ್ದಂತೆ ಹೆಚ್ಚು ಬೆಲೆಬಾಳುವ ಒಳ್ಳೆಯ ಗುಣಮಟ್ಟದ ಸಂಬಲ್​ಪುರಿ ಸೀರೆಗಳನ್ನೇ ಅವರಿಗೆ ತೋರಿಸುವಂತೆ ತಮ್ಮ ಸಿಬ್ಬಂದಿಗೆ ಮಾಲೀಕರು ಸೂಚಿಸಿದರು.

ಅಂಗಡಿ ಮಾಲೀಕರ ಕಣ್ಣಿಗೆ ಮಂಕುಬೂದಿ ಎರಚಿದ ಮಹಿಳೆಯರು: ತಮ್ಮ ಮಾಲೀಕರು ಸೂಚಿಸಿದಂತೆ ಅಂಗಡಿಯ ಸಿಬ್ಬಂದಿ ಆ ಮಹಿಳೆಯರಿಗೆ ಸಂಬಲ್​ಪುರಿ ಸಾರಿಗಳನ್ನೇ ತೋರಿಸಿದರು. ಆದ್ರೆ ಈ ಚಾಲಾಕಿ ಮಹಿಳೆಯರು ಮಾತ್ರ ಈ ಸೀರೆಗಳನ್ನು ಖರೀದಿಸುವ ನೆಪದಲ್ಲಿ ಅವುಗಳನ್ನು ಉಪಾಯದಿಂದ ಕದ್ದೊಯ್ದಿದ್ದಾರೆ. ಇವರ ಈ ಕೃತ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಪೊಲೀಸರು ಆರೋಪಿಗಳ ಪತ್ತೆಗೆ ಜಾಲ ಬೀಸಿದ್ದಾರೆ.

ಬಟ್ಟೆ ಅಂಗಡಿಯ ಮ್ಯಾನೇಜರ್​ ಹೇಳುವ ಪ್ರಕಾರ, ಶನಿವಾರ ಬೆಳಗ್ಗೆ 11 ಗಂಟೆ ಸುಮಾರಿಗೆ ನಮ್ಮ ಅಂಗಡಿ ಮುಂದೆ ಒಂದು ಐಷಾರಾಮಿ ಕಾರು ಬಂದು ನಿಂತಿತು. ಅದರಿಂದ ಚಾಲಕ ಮತ್ತು ಏಳು ಜನ ಮಹಿಳೆಯರು ಇಳಿದರು. ಐಷಾರಾಮಿ ಕಾರಿನಲ್ಲಿ 7 ಜನ ಮಹಿಳೆಯರು ಬಂದಿದ್ದಕ್ಕೆ ಸಾಮಾನ್ಯವಾಗಿ ನಮ್ಮ ಸಿಬ್ಬಂದಿ ದುಬಾರಿ ಬೆಲೆಯ ಸೀರೆಗಳನ್ನೇ ಅವರಿಗೆ ತೋರಿಸಿದರು. ಈ ಸಂದರ್ಭದಲ್ಲಿ ನಮ್ಮ ಕೆಲ ಸಿಬ್ಬಂದಿ ಉಪಹಾರ ತಿನ್ನಲು ಹೊರ ಹೋಗಿದ್ದರು. ಹೀಗಾಗಿ ಅಂಗಡಿಯಲ್ಲಿ ಕೇವಲ ಇಬ್ಬರು ಸಿಬ್ಬಂದಿ ಮಾತ್ರ ಇದ್ದರು. ಸೀರೆ ಖರೀದಿಗೆ ಬಂದಿದ್ದ ಮಹಿಳೆಯರು ಖರೀದಿಸುವ ಬದಲಾಗಿ ಆ ಸೀರೆಗಳನ್ನು ತಾವು ಧರಿಸಿದ್ದ ಸೀರೆಯೊಳಗೆ ಅಡಗಿಸಿಟ್ಟುಕೊಂಡು ಹೋಗಿದ್ದಾರೆ. ತಮ್ಮ ತೊಡೆಯ ಸಂದಿನಲ್ಲಿ ಸಂಬಲ್​ಪುರಿ ಸೀರೆಗಳನ್ನು ಇಟ್ಟುಕೊಂಡು, ಯಾವುದೇ ಸೀರೆಯನ್ನು ಖರೀದಿಸದೆ ಅಂಗಡಿಯಿಂದ ಹೊರ ಹೋಗಿದ್ದಾರೆ. ಇದು ನಮಗೆ ಸೀರೆಗಳನ್ನು ಲೆಕ್ಕ ಹಾಕುವಾಗ ಗಮನಕ್ಕೆ ಬಂತು. ಆಗ ಸಿಸಿಟಿವಿ ಪರಿಶೀಲನೆ ಮಾಡಿದಾಗ ಆ ಮಹಿಳೆಯರ ಚಾಲಾಕಿತನದ ಬಗ್ಗೆ ಗೊತ್ತಾಯಿತು ಎಂದು ನಡೆದ ಘಟನೆ ಬಗ್ಗೆ ವಿವರಿಸಿದರು.

ಬಟ್ಟೆ ಅಂಗಡಿಯ ಸಿಬ್ಬಂದಿ ನೀಡಿದ ದೂರು ಆಧರಿಸಿ ಪ್ರಕರಣ ದಾಖಲಿಸಿಕೊಂಡಿದ್ದೇವೆ. ಅಂಗುಲ್ ಐಐಸಿ ಪ್ರಕಾಶ್​ ಚಂದ್ರ ಮಾಝಿ ಬೊಯಾನಿಕಾ ಶೋರೂಮ್ ಗೆ ತೆರಳಿ ಅಲ್ಲಿನ ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಿದ್ದಾರೆ. ಅಲ್ಲದೆ, ಅಂಗಡಿಯ ಸಿಬ್ಬಂದಿಯನ್ನು ಈ ಕುರಿತಂತೆ ವಿಚಾರಣೆ ಮಾಡಲಾಗಿದೆ. ಸಿಸಿಟಿವಿಯಲ್ಲಿ ದಾಖಲಾದ ಕಾರು ಬಡಕೇರಾ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಚಲಿಸಿರುವುದು ಗೊತ್ತಾಗಿದೆ. ಬಿಎನ್​ಎಸ್​ 305 ಎ ಅಡಿ ಶನಿವಾರ ಎ.11 ರಂದು ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರು ಈಟಿವಿ ಭಾರತಕ್ಕೆ ಮಾಹಿತಿ ನೀಡಿದ್ದಾರೆ.